खुर्सानी खाने प्रतियोगिता

प्रतियोगिता पनि कस्ताकस्ता ? स्कटल्याण्डको एडिनबरामा हालै खुर्सानी खाने प्रतियोगिता भएको छ । त्यहाँ रहेको भारतीय व्यापारीको किस्मत रेष्टुरेन्टले संसारकै सबैभन्दा पिरो खुर्सानीको तरकारी खाने प्रतियोगिता गरेको हो ।

किस्मत किलर नामको प्रतियोगितामा भाग लिन २० जना साहसी मानिस आएका थिए । तर विडम्बना अलिकति खुर्सानी खानेबित्तिकै धेरैजसो जमिनमा लडे, कोही अचेत भए भने कतिले उल्टी गरे । दुइजनालाई त अस्पताल नै लैजानुपर्यो । आधाजसो मानिस सुरुमै लडेपछि बाँकी रहेका प्रतियोगिले पनि सबै खुर्सानी खाने आँट गरेनन् जसका कारण प्रतियोगितामा कोहीपनि विजयी भएन ।

प्रतियोगीलाई खुर्सानी खाने प्रतियोगितामा सहभागि हुनुभन्दा पहिला ने ज्यानको जोखिम वा अरु कुनै स्वास्थ्य समस्या आएमा आफै जिम्मेबार हुने भनी करारनामा गराइएको थियो ।

रेष्टुरेन्टका मालिक अब्दुल अली आफुले यो प्रतियोगिताबाट च्यारिटीको लागि सयौँ डलर संकलन गर्न सफल भएको बताउँछन् ।

यो प्रतियोगिताका आलोचकहरु यसले मानिसको जिवनमै खेलवाड गरेको बताउँछन् ।

तर विश्वको सबैभन्दा पिरो खुर्सानी भूत जोलोकियाको अनुसन्धान गरेका मेक्सिको विश्वविद्यालयका पल बोस्ल्याण्ड भने मानिसले पिरो खुर्सानीको तीन पाउण्ड भन्दा बढि धूलो खाएमा मात्र उसको ज्यान जानसक्छ । तर हामी यतिधेरै खुर्सानी खाने कल्पना पनि गर्न सक्दैनौँ । त्यसैले थोरै खुर्सानी खाने यस्ता प्रतियोगिता ज्यानका लागि जोखिम छैनन् भन्ने दाबी आयोजक रेष्टुरेन्टको छ ।